2015年12月22日 星期二

從來未食過咁好食嘅點心

個標題寫到咁
真係名不虛傳
有留意開米之蓮嘅朋友
就知道佢係澳門米之蓮三星嘅餐廳
一入門口你就會見到大大隻8 字

入面都係以中式裝修為主
牆上面係金魚嘅圖案
而走廊頭中間都有好多同水有關嘅裝飾
應該係寓意水為財卦😂😂😂

點完菜之後就會送上第一個餐廳為你準備嘅小食

連小食都係鮑魚真係唔野少👍🏽👍🏽👍🏽


係柚子啫喱配冰鎮鮑魚同炸網配豬肉三色椒

啫喱令到鮑魚口感冇咁溜之餘
仲能夠襯托出鮑魚嘅鮮味


呢間餐廳出名點心夠精緻
第一道就係藍天使蝦金魚餃
一籠只有三隻盛為$72
不過我哋就叫多咗幾份因為我哋人數比較多

另一樣我非常之鍾意嘅係金網叉燒酥



的確睇落去同平時嘅叉燒酥好大分別
金網做到非常之鬆脆
入面嘅叉燒亦都非常之好味
唔會過分甜,甜度剛剛好


呢個係蟹肉撻
又係好味到暈,撻皮鬆脆餡料豐富


河蝦肉鬆手袋酥
外非常之精緻
酥皮一咬即碎,差啲連夾上隻碟都會爛
不過味道就比較普通
冇辦法突出蝦同肉鬆嘅味道



呢個箭豬形叉燒包
淨係睇佢嘅手工已經值回票價


呢個係鮑魚蝦餃
鮑魚夠晒大隻又夠彈牙🎉🎉🎉

最後仲送上甜奶茶同葡撻
為呢餐畫上一個完美句號

The eight 

Address : 葡京路新葡京酒店2樓

2015年11月22日 星期日

頭咁大個梳乎里 ❤️



^_^以前係IFC 好多人都會去st Betty食tea 
不過最近同一個位置已經換上左新嘅南法國餐廳
叫做Ivy
店舖感覺上比較casual 店員態度亦都非常親切,唔似平時食嘅高檔餐廳
有種親切感
不過如果有埋法國靚仔做waiter應該仲正😂

前菜種類都算幾多
我哋選擇咗 tuna carpaccio 
吞拿魚嘅生魚片上面配上rocket同芒果粒
食落口偏鹹
不過呢個配搭食落口有種去咗南法沙灘嘅感覺😂


另一道菜我哋揀咗French green beans & foie gras 
係一道沙律嚟嘅
上台嘅時候下邊用冰鎮住
能夠令到豆同鵝肝入口都有少少凍嘅感覺
由於仲加左番茄粒食落去唔會感覺太油膩

最近仲有White truffle menu 
所以叫咗呢個white truffle beef tartar 
不過個人覺得麻麻地
因為生牛肉完全蓋過咗white truffle 嘅味道

不過全晚嘅亮點
其實係呢個頭咁大個嘅疏乎厘
Size真係可以夠四個人食
質感比較實淨,所以上枱影完一陣相
都仲保持企係度
最正嘅佢仲配上咗雲呢拿汁
 將雲呢拿汁倒入去
哇!真係好好味呀

Ivy 
ifC 2樓2075號舖


2015年11月10日 星期二

雪糕還是多花款的好😂



雪糕一向都係甜品之中我其中一個最愛
最近又試咗新味道啦
有睇我blog嘅朋友都知道
 之前我都有寫過呢間鋪頭
不過見佢今次出新味而且款式有好多
所以忍唔住又寫下

除咗以往嘅火牛牛等等以往已經配搭好嘅口味
仲可以俾你自己加材料
最特別嘅都係花曲奇哈哈笑曲奇
另一個自己好鍾意嘅係綠茶威化卷
因為係出邊真係比較少見


其實今次推出新款
係可以用雪糕配搭
果昔或者杯子蛋糕做底
但係由於佢哋嘅手繪雪糕筒實在太靚啦
😂😂😂😂😂
所以最後都係忍唔住揀咗手繪雪糕筒

今次仲特登試咗新口味大豆味
食落去其實口感有啲似維他奶
不過會比維他奶再濃味一啲



粟米味係另一個我試嘅口味
入口係好濃嘅粟米味
不過味道會偏甜,如果喜歡淡味嘅朋友可以選大豆味!

放牛牛
尖沙咀麼地道32號地舖

2015年10月15日 星期四

羊胎素究竟是怎樣的一回事?

來寫寫我的試用報告





其實自己從來冇試過用羊胎素有關嘅保濕用品
今次算係第一次試
相信好多人都知道羊胎素有活化細胞嘅作用
今次試呢個就叫做羊胎素透明質酸保濕肌底液
一盒有十四枝
用法就有好多種
可以喺平時用完化妝水之後,
再搽當保濕用途早晚各一次
我嘅用法就係先用爽膚水再用羊胎素肌底液,最後先用上我平時用嘅美白精華


亦都可以喺敷面膜前作打底之用
能夠有效鎖住面膜嘅精華


仲有另一個方法我非常建議空姐
或者因為工作需要經常要飛嘅女士
一次嘅原液加上15ml 嘅蒸餾水
倒入細小嘅噴壺度
就可以隨身攜帶當作保濕噴霧
即將要飛上海嘅我又大派用途啦!

用左大概五日嘅時間,
明顯覺得肌膚嘅瑣水程度高左
就算最近天氣開始乾燥
用完第二朝起身都唔會覺得皮膚乾
我仲試過係暗倉印嘅位置
用一至兩滴去按摩
五日之後印明顯減淡
一盒$600 每枝原液都係大概$42左右
好抵丫

資料提供
facebook.com/inglemirepharmshk

官方認可銷售店
www.loveskinshop.hk

實體店:
Unit116,Solo building,41-43Carnavon Rd,TST
尖沙咁加拿芬道41至43號Solo Building 1樓116鋪
(加拿芬廣場對面,1樓出電梯轉右)
零售及批發 Tel: 35759430


2015年10月13日 星期二

Godiva x ritz Carlton 酥味tea set

Godiva x ritz Carlton tea set 
今次呢個tea set時間比較長
去到出年嘅1月1號
不過11月30號之前定位去食就會比較平
所以如果有興趣又唔想迫嘅朋友
就可以早啲去試吓啦
12月1號之後價錢就會貴啲啦!
今次冇以往嘅咁難訂位
只係早一日訂都仲有位喎

同以往一樣幾乎八成都係朱古力嘅甜品
如果唔係朱古力埋去食都會覺得幾溜
tea set 嘅架就用上金色同熱氣球形狀
感覺上更顯高貴





成個tea set 總共有三個鹹點
其餘嘅全部都係甜點
鹹點包括有
魚子醬配蘇格蘭煙三文魚水瓜柳粒包,玉米雞沙律火箭菜無酵母雜殼包,
黑芝麻鴨肝檸檬迷你三文治

個人最鍾意三文魚水瓜柳粒包,
可能因為我對三文魚情有獨鍾
煙三文魚鹹鹹地,配上水瓜就能夠有種
冇咁咸又有啲Fresh 嘅感覺



今次Tea set係以酥餅作為主題
所以每樣朱古力都有酥餅做底
未到包括有抹茶酥餅,朱古力酥餅
夏威夷果仁薑味酥餅,合桃朱古力碎酥餅,比利時餅乾杏仁酥餅等等





飲品方面可以選擇隨套餐附送嘅
榛子朱古力,其實味道唔錯亦唔苦
不過食完咁多以朱古力作為主題嘅甜品之後
個人建議可以選擇飲杯茶會比較好
能夠清一清味蕾
再試吓下一道甜品

Cafe 103
地址:環球貿易廣場麗思卡爾頓酒店
11月30號前$388一位

2015年10月7日 星期三

Burger and lobster HK version


Burger and lobster 
好多人係外國都食過
不過香港一直都無
最近終於係長沙灣呢個地方
開咗一間類似嘅嘢



Menu主要都係burger 同埋lobster 
有原隻lobster, 龍蝦湯 同lobster roll
不過除咗最主要嘅呢幾樣野之外
佢哋嘅cocktail 同甜品都非常特別
呢度主打係用新鮮龍蝦
所以我落去都非常新鮮同彈牙
不過龍蝦就偏凍麵包就偏熱
個人覺得如果龍蝦再熱啲就更加好啦👍🏻


另外鋪頭都有好多特別嘅黑啤可以選擇
我揀呢個就係rating top 100 嘅黑啤
不錯喔!

甜品係幾喜出望外
而且仲非常之大份
足夠三至四個人食❤️❤️❤️❤️
而且賣相仲非常之靚亦都有好多選擇

不過係長沙灣區搵到呢類型嘅鋪頭實屬少見
但係有樣要一提嘅就係
之前打電話去book 咗
去到就話冇呢個Booking==
安排咗我地坐吧枱,但係其他大嘅枱就冇客人坐😞😞😞
老實講對於安排實在有啲失望
希望下次去嘅時候餐廳可以有所改進啦

Mama burger and lobster 
昌華街49號昌輝大廈地下



 

2015年9月26日 星期六

懷舊古式老風味

為同阿嫲慶祝生日
都post 唔晒,九餸一湯
為到都係$1090
抵到爛👍🏻👍🏻👍🏻👍🏻
九個人食真係個個都捧住個肚走

我哋預先打電話去
訂咗八寶鴨,魚腸蒸蛋同杏汁豬肺湯
其次有好多餸睇Menu上邊都冇嘅
例如:炸蝦丸,盤龍鱔,花雕蛋白蒸海蝦 
所以建議大家都係早啲打去訂自己想食嘅餸



如果唔係好多餸去到都冇得即叫即有
特別係因為中秋節所以我哋都一個星期之前訂枱
八寶鴨非常之足料
入邊有栗子蓮子等等
識煮餸嘅朋友都知道我整八寶鴨嘅工序非常之繁複,所以個人覺得非常之抵食



另一個推介嘅就係
杏汁豬肺湯
冇味精之餘材料亦都十足
幾乎每日會都有豬肺同豬肉,滿滿的!



另外一個好多人叫嘅菜式就係魚腸蒸蛋
因為呢個菜式係外邊已經好少有得食
蒸蛋下邊仲放滿左薑絲
不過個人就覺得薑味濃得濟
少啲薑絲應該會更加好味



環境唔係特別乾淨,
因為大家去食嘅都係食嗰陣人情味同埋老舖嘅味道
除咗入邊嘅裝修充滿老式嘅味道,
就連招呼客人的都係上咗年紀嘅人
但係佢哋招呼客人仍然中氣十足,勁!

金碧酒樓
彩虹邨金碧樓22號地下

#hailey好味推介 #hailey好食推介 #yummy #八寶鴨 #九餸一湯 #

2015年9月21日 星期一

我的中村藤吉初體驗

最初開店的時候
要攞籌
聽聞有唔少人大清早店未開門
就已經排隊
籌拎到手之後
有啲甚至要等到下午五六點先至入場
討厭排隊嘅我
完全冇諗住要係熱潮期間去
到最近熱潮開始慢慢減退
我先打算去試吓

當日下晝五點幾
去到大概要等七至八張枱
見唔駛等好耐於是的起心肝等下
大概等左25分鐘就有得入去啦

好開心可以坐係近窗邊嘅位置景觀一流


聽好多朋友講過
大概知道有啲乜嘢好食
於是叫咗一個芭菲同綠茶烏冬
佢嘅烏冬同我哋平時想像嘅烏冬有啲唔同,其實質感有啲似蕎麥面
食落去都冇咩綠茶嘅味道不過就非常彈口

已芭菲就最啱兩個人去又想試多啲嘢嘅朋友
事關入面有齊軟雪糕,蛋糕,綠茶啫喱同丸子等等


上面層cream 口感非常之滑
蛋糕亦都非常之鬆軟
cream 溶咗之後,令到蛋糕有點濕潤的口感
芭菲另外仲有焙茶口味
枱面上面大家飲嘅就係焙茶啦
所以建議大家可以先試飲一下再決定想試乜嘢未


總括來講我都覺得係一間好值得試嘅餐廳,雖然食品選擇比較少,但係熱愛綠茶嘅朋友就一定要試吓啦!

中村藤吉
尖沙咀彌敦道100號The ONE 18樓


2015年8月25日 星期二

我彈下彈下彈下彈下



呢期hit 到爆嘅一間餐廳
Crossover 左點心之後
又有另一個再去呢間餐廳嘅理由
本身就已經好鍾意去呢度食點心
今次佢同梳乎旦crossover 
淨係個樣已經夠晒吸引
重有咁多款唔同嘅點心同甜品
真係淨係睇個樣都抵

個奶皇包同牛奶布甸都係我嘅推介
不過提醒大家
個奶皇包上枱之後要盡快食
如果想影佢嘔,就更加要趁熱影
因為咁先會效果靚同埋更好食
個奶皇包一啖咬落去
真係流心架!😍
唔單止食物個樣有梳乎旦
就連現場嘅佈置同埋餐具都有梳乎旦個樣







牛奶布甸唔太甜亦都幾滑質地唔錯
而係上面黃色個舊其實係芒果味嘅布甸
喜歡口味比較清淡嘅朋友一定鍾意!


不過有幾樣點心仍然係 coming soon
所以睇嚟都係要再嚟多次朝聖

点心代表
地址:尖沙咀the one L308